المكونات بسيطة جدا :
6ملاعق طعام زيت زيتون (يكون نوع درجة أولى ومخصص للأكل علشان تضمني إنه بيور و بدون إضافات)
2 ملعقة طعام زيت سمسم
حطيهم في زجاجة نضيفة ورجيهم
طريقة الإستخدام :
إغسلي وجهك بطريقتك العادية واشطفيه ونشفيه
إفتحي زجاجة الواقي اللي عملناه وخدي منها في كفة إيدك مقدار نصف معلقة صغيرة وعليهم نقطتين ماء (علشان الترطيب)ووزعيهم على كل وشك واستغلي الفرصة واعملي مساج للوجه وانت بتحطي الواقي بحركات دائرية لأعلى وسيبيه شوية مثلا دقيقتين على ما البشرة ما تتشرب معظمه وبعدين هنطفي اللمعة
طريقتي الطبيعية لإطفاء اللمعة والله بجد وبدون تريقة:
أنا شايفة الطريقة دي على اليوتيوب بس انا جديدة معاكم ومعرفتش أنزل الفيديو
بتجيبي نص كوب نشا وتنخليه لازم تنخليه وتحطيه في برطمان جوانبه عالية شوية وتخصصي فرشة روجاجو كبيرة زي دي
تاخدي بيها شوية نشا وتخبطي على جوانب البرطمان علشان توقعي الزيادة جوة البرطمان وتمشي الفرشة تحت عينيكي وعلى كل وشك وتنفضي بيها الزيادة من على الوش هتلاقي مفيش لمعة ولا لون نهائي(زي البودرة الشفافة)كأنك مش حاطة أي حاجة على وشك بس وشك مترطب وفي نفس الوقت منوّر وكل الناس هتفتكر إنك مش بتحطي أي حاجة على بشرتك وشكلك هيبقى طبيعي
النتائج :
والله العظيم كل زميلاتي في الشغل عارفين إني ملتزمة ومش بحط ميكب ولا كريم بشرة لإن عندي حساسية من معظم كريمات البشرة وبشرتي بتلتهب من أي كريم مهما كان غالي ولا بودرة طبعا وكلهم مستغربين إني مهما خرجت في الشمس بيضه ومش بسمر وكمان بشرتي مشدودة
شاركنا رأيك وكن اول من يقوم بالتعليق :)[ 0 ]
إرسال تعليق