انا تعرفت على شب عن طريق الصدفة وبقينا اصحاب جدا..وقريبين من بعض وكنا بنحكي مع بعض كل يوم تقريبا وهو كان يسأل عني دايما وياما لمحلي انه معجب بيا وبيتابعني والخ…والشب خلوق جدا ومتدين وبيعرف ربنا، وشخصيته حلوة جدا دمه خفيف وراكز وفيه حاجات كتير إيجابية، بعدين انا عملت جروب عالفيس بوك حطيت فيه الناس اللي اعزهم..كان فيه بينهم بنات ما اعرفهمش كويس. وحدة فيهم بدأت ترسم عليه…بس هو كان اهتمامه بيا باين جدا قدام الكل…وانا عرفته عالباقي، هما كانوا البنات اجرأ مني بالكلام يعني انا اخجل المح للشاب اني معجبة بيه وبحبه هما لا، بس هو كان حاسس لان حصلت مشاكل افتعلتها البنت وفيه لحظات غرت عليه فبان عليا. المهم احنا بقا بينا مسجات عالتلفون وكده ومرة عملي خدمة صمم انه يعملها ليا وكانت من اقتراحه انه يساعدني فحسيت فعلا انه مهتم بيا، شوية شوية تفاقمت المشاكل مع البنات ومرة فقدت فيها اعصابي والبنات عملوا فيها انهم زعلوا وخرجوا من الجروب جماعي بس هما كانوا متفقين مع بعض وعاوزين يتخلصوا مني عشان هو مهتم بيا، بس هما ما يعرفوش اننا اصدقاء قريبين وكان بينا تواصل، وعملوا جروب تاني من غيري وهو زعل من عصبيتي وترك جروبي وراح معاهم الجروب لكنه بعدها صمم اننا نبقى نخرج مع بعض وبنفس الوقت غير معاملته معايا.انا مع العلم وافقت اخرج لكني ما خرجتش لان ده مش من طبيعتي اني اخرج مع شاب..يوم منا عمل الخدمة ساعدني وما قعدناش سوا ولا حاجة، بنفس الوقت قل سؤاله عليا واحيانا بقا ما يردش على مسجاتي…بس هو بيعزني جدا وفي مواقف معينة يبان عليه الاهتمام. مش عشان رفضت الخروج معاه لا خالص، لأن هو من قبل ما ارفض او اقبل تغير انا اعتذرت عن المشكلة اللي حصلت وقالي انه مش زعلن وانه مش بيفكر فيها خالص، لكنه دايما لما يحس انه ممكن يخسرني يبان عليه الاهتمام وبيقلق عليا وبيخاف عليا…وعلى فكرة هو ما فيش بينه وبين البنت التانية اي حاجة خالص مجرد صديقة وانا تاكدت من الكلام ده، بعدين هو كان عاش تجربة حب من كم سنة واعترفلي بيها وخسر البنت اللي بيحبها ولسا متألم من الموضوع ده. انا دلوقتي تواصلي معاه خفيف انا خايفة اقاطعه لاني بحبه جدا والله العظيم، ما تعرفوش قد ايه حسيته قريب مني، خايفة اخرج معاه واندم، وخايفة لو ما خرجتش يكون عايز يقولي حاجة معينة شخصيا وعدم خروجي يمنعه. لحد دلوقتي مش قادرة اتجاهله لاني بحبه جدا مش فاهمة بيتصرف كده معايا ليه. يعني هو لو حس اني تعبانة او في مشكلة يتصل بيا حالا يتطمن عليا. بنفس الوقت تواصله في الظروف العادية نادر جدا بقا، مع انه كان يقولي كل حاجة ويفضفضلي عن كل حاجة وياما قالي انه بيرتاح للكلام معايا جدا مش عارفة اعمل ايه..أنا اول مرة احب وللعلم احنا مش صغيرين احنا التنين في التلاتين، يعني مش في عمر لعب العيال ده…وانا اول مرة احب حد بالطريقة دي..اصله بني ادم نضيف جدا ومش حلاقي حد زيه…مع العلم ان عندي مشكلة في الوثوق بالرجالة لان كل اللي حواليا عاشوا تجارب زواج فاشلة…انا عمري ما وثقت وحبيت حد كده