انا عروسه يادوب بقالي شهر وكام يوم وعايزة اقولكم نصيحه بأه بخصوص شعرنا الي مغلبنا ع طول ده


بس استحملو معايا ونبدأ الحكايه من الاول


:
انا شعري كيرلي , ومشكلتي الازليه في الهيشان

مهمها عملت فيه حتى لو اتفرد بيفضل هااااااااايش وتلاقي حاجات واقفه وكده, والقصه المعروفه دي



فقلت طبعا لازما وحتما ولابد قبل الفرح أفرده هوا انا هقعد بعد الفرح الف واسشور .. لاااااااا مش هلحق ولازم يشوفني على سنجة عشره طووووووول الوقت

ومش هعمل كيراتين ولابروتين ولا الحاجات دي , لأنه بغض النظر عن السعر الا ان مفيش حد قريب مني بيعمله وكنت مكسله الصراحه اطلع بره الشارع اصلا...

وانا كنت مجربه الفرد قبل كده يعني خبره, وكنت بعمله لنفسي ف البيت..

قلت طبعا هعمل فرد عادي ..
وانا بشتري لقيت فرد عجيب كده البنت قعدت تشكر لي فيه وتقولي ايطالي ومعرفش ايه..

معلش مش عندي صورته عشان سيبته في بيت بابا ومش لقيتله صور ع النت, هيا علبته لونها بينك كده.. مش الايجو الايطالي خالص لأ الاخير ده انا مجربا وعارفاه ( مفيش فرق كبير بينهم يعني )..

المهم أخدته, وعملته زي الشاطره , والنتيجه



شعري زي ماهو الكيرلي.. والي زاد وغطى انه بقى محروق

مع ان شعري ماشاء الله كان اصلا قوي وكويس مفيش تقصيف ولا تساقط ولا الكلام ده..

بس هنقول ايه بأه , يلا حسبي ربي

قعدت شويه مذبهله ومخنوقه ومش عارفه اعمل ايه وفاضل ع الفرح اسبوعين

المهم فوقت وركزت كده وبدأت الخطه.. عشر ايام عنايه ودلع في شعري زي الكتاب ماقال

وانا اصلا بستعمل له منتجات كويسه دايما بس بزياده بأه اليومين دول..


جبت شامبو وكونديشنر جليس بالكيراتين, جامد جدا ماشاء الله الاتنين تقريبا ب 50 ج




وجبت ماسك جليس برده للعنايه المركزه, بس ده مرتين في الشهر بالكتير وجبته ب 50 جنيه برده




وانا في العادي بستعمل حمام كريم بيوبوينت بالنخاع وده طبعا حبيب الملايين, كل تلات ايام

وده طبعا غير الاهتمام بأكلي وشرب الميه الكتيييييييييييير والله يابنات حاجه مفيده جدا وفعاله للشعر والبشره





بدأ شعري يشد حيله والفرح هل خلاص عقبال عندكم, طب هعمل ايه بأه



انا مش بحب اروح لكوافيرات الصراحه , لاأنا ولا اخواتي في افراحنا وشبكاتنا ...
يوم الفرح يادوب روحت عملت وشي بس وروحت البيت جري عشان اعمل شعري..

ايوه , عملته بحبيبة قلبي , الاختراع الرائع في تارخ البشريه

(((البيبي ليس))))

عندي واحده اصلا من قبل كده الي هيا i curl دي

جميله جدا وانا مجرباها من قبل كده


وعملت شعري بيها مخدش نص ساعه عشان كنت بعمله بذمه اوي

ولفيته ولبست فستاني والحمدلله

ويومها بعد ماروحت كان شعري ماشاء الله عليه بشهاده عريسي الي مش بيعلق على حاجه الا لما تكون مهوله ورائعه ومحصلتش





وبقيت بعد كده على طول هيا دراعي اليمين, في ثواني بكون عامله شعري ولافاه رولو وعشر دقايق وافكه ويبقى ماشاء الله.. مش بستغنى عنها ابدا وأحسن ميت مره من الفرد والتكاليف وضرر الشعر..
هتقولي مش هلحق اعمل والف, متنسيش ياقمرايه اني انا اصلا كنت متزعمه المبدأ ده , بس دلوقتي غيرته خالص..

انا بطلع من الحمام , لو هوا في الشغل يبقى براحتي خالص ,, ولو هوا هنا بقوله ياحبيبي انا في الاوده بعمل شوية طقوس كده وطالعه

وهوا متعود اول ماقوله داخله الاوده اعمل حاجه بيعرف انها حاجه شخصيه ومش بيسأل ولا بيرخم وانتي لازم تعوديه على كده , ماهو كله ف مصلحته ف الاخر, وربع ساعه واكون مخلصه.. وغالبا مش بعمل شعري كله
يعني النص الي فوق بس, والفرق الكبير طبعا للهانم القصه,, هيا دي الي بتفرق وتبغير شكلها كل شويه وبيبقى الفرق الشاسع